NaturClimak badu dagoeneko webgunea
Maiatzaren 5etik, NaturClimak badu webgunea: https://naturclima-poctefa.eu. Bertan, INTERREG POCTEFA proiektuaren gaurkotasun osoa jasotzen da gaztelaniaz, frantsesez eta euskaraz. Proiektu horrek Europar Batasunaren partaidetza du, eta Eskualde Garapenerako Europako Funtsak (EGEF) batera finantzatzen du. 2019tik 2022ra bitartean gauzatuko da.
Atari berriak “NaturClima” izeneko atal bat du, eta proiektu horren ikuspegi orokorra eskaintzen da bertan. Proiektua Pirinioen bi aldeetako naturguneen kudeaketaz eta gobernantzaz arduratzen diren erakundeen arteko lankidetza areagotzera zuzendurik dago; gune horiek klima-aldaketara egokitzea babesteko eta sustatzeko, bai eta egokitzapen hori hobetzeko ere. Atal horretan proiektuaren bazkide diren entitateak ageri dira: Nafarroako Gobernuko Landa Garapeneko eta Ingurumeneko Departamentua, proiektu buru gisa; Nafarroako Ingurumen Kudeaketa (GAN-NIK) eta NASUVINSA sozietate publikoak (LURSAREA Nafarroako Lurralde eta Jasangarritasun Agentziaren bidez); Parc National de Pyrenées; Bigorre-Pyrenées CPIE elkartea; eta Miarritzeko Centre de la Mer. Aurreikusitako ekintzak ere ageri dira zehaztuta; ekintza horiek klima-aldaketara egokitzearen eta gobernantza parte-hartzailearen arloan dagoen ezagutza kapitalizatzera daude bideratuak, beste leku batzuetarako erreferentzia izango diren esperientzia berritzaileak garatzeko.
Aipamen berezia merezi du Jardunbide Egokiei buruzko atalak. Bertan, naturguneetan klima-aldaketara egokitzeko 24 ekimen jaso dira, proiektuaren baitan aztertu direnak. Bestalde, “Naturguneak” kapituluan, proiektuaren ekintzak ezartzeko erabiliko diren gune pilotuak ageri dira deskribatuta: Nafarroako Bertizko Natur Parkea eta Urbasa-Andia Natur Parkea; Akitania Berriko itsasertzeko itsas guneak; eta Pirinioetako Parke Nazionala, Pirinio Garaiak eskualdean.
Beste atal batzuk proiektuaren gaurkotasunari, ingurumen-hezkuntzari eta ‘networking’ari buruzkoak dira. Azken atal horretan, klima-aldaketara egokitzearekin lotutako beste proiektu batzuk ageri dira.